Psalms 9

Kumqondisi wokuhlabelela. Ihlatshelwa njengengoma ethi “Ukufa kweNdodana.” Ihubo likaDavida.

1Ngizakudumisa, O Jehova, ngenhliziyo yami yonke; ngizafakaza ngazo zonke izimangaliso zakho.

2Ngizathokoza ngijabule ngawe; ngizahlabelela indumiso egameni lakho, wena oPhezukonke.

3Izitha zami ziyafulathela zibaleke; ziyakhubeka zitshabalale phambi kwakho.

4Ngokuba ulisekele ilungelo lami; usuhlalile esihlalweni sakho sobukhosi wahlulela kakuhle.

5Uzikhuzile izizwe, wababhubhisa ababi; wawesula amabizo abo kuze kube nini lanini.

6Ukubhidlika okungapheliyo kusehlele isitha, wawasiphuna amadolobho aso; sekuphele nya lokusikhumbula.

7UJehova uyabusa kuze kube nininini; usesimisile isihlalo sakhe sobukhosi ukuze ahlulele.

8Uzakwahlulela umhlaba ngokulunga; uzababusa abantu ngokulunga.

9UJehova uyisiphephelo sabacindezelweyo, uyinqaba ezikhathini zokuhlupheka.

10Labo abalaziyo ibizo lakho bazathemba kuwe, ngoba wena, Jehova, kawubafulatheli abakudingayo.

11Hlabelelani indumiso kuJehova esebukhosini eZiyoni; fakazani phakathi kwezizwe ngalokho akwenzileyo.

12Ngoba yena ophindiselayo kulowo ochitha igazi uyakhumbula; akadeli ukukhala kwabahlukuluzwayo.

13O Jehova, ake ubone ukuthi izitha zami zingichukuluza njani! Yiba lesihawu ungenyule emasangweni okufa,

14ukuze ngifakaze indumiso yakho emasangweni eNdodakazi yaseZiyoni kuthi khonale ngithokoze ngokusindisa kwakho.

15Izizwe ziwele emgodini eziwumbileyo; izinyawo zazo zibanjwe emambuleni eziwathiyileyo.

16UJehova waziwa ngokwahlulela kwakhe okulungileyo; ababi babanjwa yizenzo zezandla zabo.

17Ababi babuyela engcwabeni, zonke izizwe ezikhohlwa uNkulunkulu.

18Kodwa abaswelayo kabayikukhohlakala kokuphela, njalo lethemba labahlukuluzwayo kaliyikutshabalala.

19Vuka, hawu Jehova, ungayekeli umuntu anqobe; akuthi izizwe zahlulelwe phambi kwakho.

20Batshayise ngovalo, O Jehova; akuthi izizwe zikwazi ukuthi zingabantu nje.
Copyright information for NdeIBE